Kryeministri i Kosovës takohet me kryetarin e Këshillit Kombëtar të Zvicrës

Foto: Zyra e Kryeministrit

Kryeministri i Kosovës, Albin Kurti, në Bernë është pritur nga Kryetari i Këshillit Kombëtar të Zvicrës, Eric Nussbaumer bashkë me deputetin Cedric Wermuth dhe deputetin zviceran me prejardhje shqiptare, Islam Aliaj që janë pjesë e Grupit Parlamentar të Miqësisë Kosovë-Zvicër.

Sipas njoftimit, gjatë bashkëbisedimit, kryeministri Kurti theksoi rritjen ekonomike dhe progresin demokratik të shtetit tonë në tri vitet e fundit, duke veçuar edhe vëmendjen e veçantë ndaj sektorit të energjisë, transmeton albinfo.ch.

Njoftimi bwnw tw ditur se në lidhje me këtë të fundit, Kurti e njoftoi Nussbaumer për projektin e ardhshëm konkurrues të energjisë së prodhuar me erë prej 150 MW, dhe suksesin e ankandit të parë solar prej 100 MW në të cilin fitues u shpall konzorciumi “Orllati” nga mërgata jonë në Zvicër, bashkë me kompani nga Gjermania dhe Kosova.

Tutje, Kurti theksoi marrëdhëniet e fuqishme mes dy vendeve dhe mundësinë për rritje të mëtejme të shkëmbimit tregtar dhe thellimit të bashkëpunimit ekonomik, gjersa eksportet dhe importet e dyanshme janë rritur në mënyrë të theksuar në katër vitet e fundit.

“U diskutua dhe mbi politikat qeveritare gjithëpërfshirëse, ku kryeministri përmendi ndër të tjera bursat për vajzat dhe gratë në STEM, shkencë, teknologji, inxhinieri dhe matematikë, skemat e mbështetjes për nënat lehona dhe fëmijët, rritjen e pagës minimale, rritjen e pagave në sektorin publik dhe të pensioneve, dhe punën në lidhjen e tregut të punësimit me aftësimin profesional. Kurti theksoi dhe angazhimin e palëkundur të Kosovës për anëtarësim në organizatat ndërkombëtare ku edhe falënderoi shtetin e Zvicrës për mbështetjen dhe përkrahjen e vazhdueshme”, thuhet në njoftim.