Kriminaliteti, dallime të mëdha regjionale

Ndërkohë që në kantonin e Gjenevës në 1000 banorë janë regjistruar 217 vepra penale, në Appenzel, vetëm 23 sosh

Sipas të dhënave statistikore lidhur me kriminalitetin në Zvicër gjatë vitit 2011, të publikuara të hënën, vihen re dallime të konsiderueshme në mes të regjioneve. Kështu, në gjithë Zvicrën në 1000 banorë bien mesatarisht nga 71.1 vepra penale.

Por, ndërkohë që në Gjenevë në 1000 banorë janë regjistruar 217 vepra penale e në Lozanë 189.5, ky numër në Cyrih është 138.9 ndërsa në Winterthur 91.3. Por, më së paku delikte janë shënuar në kantonet e vogla malore si në të dy Appenzelët dhe në Uri, gjegjësisht 23 dhe 25 akte në 1000 banorë.

Ndërkaq, në kantonin e Cyrihut dhe në atë të Bernës ka një dallim të madh në mes të numrit të veprave penale të regjistruara në qytet dhe në fshat, me ç`rast në regjionet rurale shënohen dukshëm më pak delikte se në qendrat urbane.

Qytetarët me shtetësi të Zvicrës përbëjnë 63 për qind të të gjithë kryesve të veprave penale gjatë vitit 2011, që është për 2317 më pak se një vit më parë. Ndërsa është shtuar për 831 numri i azilkërkuesve të regjistruar si kryes të veprave penale, njofton televizioni i Zvicrës sf1.

Komuna ose fshati ku janë regjistruar më së shumti vepra penale është komuna e vogël Allaman e kantonit Vaud. Në këtë komunë janë kryer 387.8 vepra penale në 1000 banorë.