Kosovë: Protestuesit kthejnë reflektorët nga Qeveria, kërkojnë votimin e ligjit për Dhomat e Specializuara

Në natën e nëntë të protestës “Jo në emrin tim” në Prishtinë, protestuesit kanë kthyer reflektorët në drejtim të objektit të Qeverisë së Kosovës, duke përcjellë një mesazh të drejtpërdrejtë për institucionet.

Organizatori i protestës, Çlirim Haziri, kërkoi nga Qeveria dhe institucionet që të procedohet dhe votohet Projektligji për ndryshimin dhe plotësimin e Ligjit për Dhomat e Specializuara.

“Reflektorët po i kthejmë nga objekti i Qeverisë. Votojeni ligjin për Dhomat e Specializuara, durimi ynë po mbaron”, deklaroi Haziri para protestuesve.

Protesta “Jo në emrin tim” po mbahet çdo mbrëmje në Prishtinë, pas aktgjykimit të Gjykatës Speciale në Hagë ndaj ish-krerëve të Ushtrisë Çlirimtare të Kosovës.