Kosovë: Manipulimet e 28 dhjetorit, më të mëdhatë që nga viti 2010

Koordinatorja kombëtare për zgjedhje në Prokurorinë e Shtetit në Kosovë, Laura Pula, ka hedhur një sinjal alarmi për zgjedhjet e 28 dhjetorit: sipas saj, manipulimet e zbuluara janë më të mëdhatë në dekada. Deklarata u bë në emisionin Info Magazine të Klan Kosovës.

Pula kujtoi zgjedhjet e vitit 2010, kur u regjistruan parregullsi të theksuara, dhe tha se sistemi prokurorial ndërmori masa për përmirësimin e proceseve zgjedhore. Që nga 2013, sipas saj, çdo cikël zgjedhor është ndjekur nga afër, dhe nuk janë vërejtur falsifikime masive si ato të fundit, transmeton albinfo.ch.

Për të garantuar integritetin e votës, u nënshkrua një memorandum bashkëpunimi mes institucioneve kryesore: Komisioni Qendror i Zgjedhjeve, Policia e Kosovës, Këshilli Gjyqësor dhe sistemi prokurorial. Qëllimi ishte i qartë: mbrojtja e votës së qytetarit.

“Manipulimi i votave të qytetarëve për deputetë në Kuvend ishte totalisht i papritur për ne,” tha Pula, duke shtuar se masat e ndërmarra nga viti 2013 kanë dhënë rezultate të pamohueshme.

Sipas saj, kjo përmbledhje tregon se për herë të parë pas shumë vitesh, vota e qytetarit ka qenë nën një kërcënim të madh të manipulimit, duke i rikthyer vëmendjen publike tek nevoja për transparencë dhe mbikëqyrje të fortë të proceseve zgjedhore.