Kosova mbetet jashtë Eurovisionit, dështon sërish anëtarësimi në EBU

Pavarësisht ndryshimeve statutore në Bashkimin Evropian të Transmetuesve (EBU), RTK nuk arriti të sigurojë anëtarësimin, duke lënë Kosovën edhe një herë jashtë garës më të madhe evropiane të këngës.

Kosova do të mbetet edhe këtë vit jashtë Eurovisionit, pasi Radio Televizioni i Kosovës (RTK) nuk arriti të sigurojë anëtarësimin në Bashkimin Evropian të Transmetuesve (EBU), pavarësisht ndryshimeve të fundit statutore të miratuara nga organizata, përcjell albinfo.ch.

Në Asamblenë e Përgjithshme të EBU-së u pranua Kanadaja si anëtare e plotë, ndërsa Katalonisë iu krijua mundësia e anëtarësimit si “anëtare ndihmëse”. Megjithatë, kërkesa e RTK-së nuk mori dritën jeshile.

U.d. drejtoresha e përgjithshme e RTK-së, Zana Spahiu, bëri të ditur se gjatë Asamblesë ka zhvilluar takime me drejtues të EBU-së, të cilët kanë shprehur gatishmëri që kërkesa e Kosovës të shqyrtohet më tej.

RTK ka theksuar se do të vazhdojë përpjekjet për anëtarësim në EBU, me synimin që Kosova të fitojë të drejtën e pjesëmarrjes në Eurovision në të ardhmen./Albinfo.ch

---