Skip to content

Kosova eksportoi 100.5 milionë euro mallra në gusht, importoi 668.5 milionë

Deficiti tregtar arriti në 568 milionë euro, ndërsa eksportet mbuluan vetëm 15 për qind të importeve. Eksportet u rritën me 31.9 për qind, ndërsa importet me 9 për qind krahasuar me gushtin e vitit 2025.

Kosova ka regjistruar deficit tregtar prej 568 milionë eurosh gjatë muajit gusht 2026, sipas të dhënave për tregtinë e jashtme të mallrave të publikuara nga Agjencia e Statistikave të Kosovës (ASK), transmeton albinfo.ch.

Sipas të dhënave të ASK-së, në gusht Kosova eksportoi mallra në vlerë prej 100.5 milionë eurosh, që paraqet rritje prej 31.9 për qind krahasuar me gushtin e vitit 2025.

Në të njëjtën periudhë, importet arritën në 668.5 milionë euro, duke shënuar rritje prej 9 për qind në raport me të njëjtin muaj të vitit të kaluar.

Si rezultat, deficiti tregtar në gusht 2026 ishte 568 milionë euro, krahasuar me 536.8 milionë euro në gushtin e vitit 2025. Kjo paraqet rritje prej 5.8 për qind të deficitit tregtar.

Eksportet e Kosovës gjatë kësaj periudhe mbuluan rreth 15 për qind të importeve.

Metalet kryesojnë eksportet

Në strukturën e eksporteve, pjesën më të madhe e përbëjnë metalet bazë dhe artikujt prej tyre, me 21.8 për qind të totalit.

Pas tyre renditen produktet minerale me 15.5 për qind, ushqimet e përgatitura, pijet dhe duhani me 13.3 për qind, plastika, goma dhe artikujt prej tyre me 8.8 për qind, si dhe artikujt e ndryshëm të prodhuar me 6.5 për qind.

Ndërsa te importet, pjesën më të madhe e përbëjnë produktet minerale, me 19.8 për qind të importeve të përgjithshme.

Në vijim janë ushqimet e përgatitura, pijet dhe duhani me 13.1 për qind, mjetet e transportit me 11.7 për qind, makineritë, pajisjet mekanike dhe elektrike me 11.5 për qind, si dhe metalet bazë dhe artikujt prej tyre me 8 për qind.

BE-ja, destinacioni kryesor tregtar

Eksportet e Kosovës drejt vendeve të Bashkimit Evropian gjatë gushtit arritën në rreth 30 milionë euro, ose 30.2 për qind të eksporteve të përgjithshme. Krahasuar me gushtin e vitit të kaluar, eksportet drejt BE-së u rritën me 29.8 për qind.

Ndër partnerët kryesorë për eksportin e mallrave në vendet e BE-së ishin Gjermania, me 10.2 për qind, Italia me 3 për qind dhe Holanda me 2.2 për qind.

Ndërkohë, importet nga vendet e BE-së arritën në rreth 279 milionë euro, duke përbërë 41.7 për qindtë importeve të përgjithshme. Krahasuar me gushtin e vitit 2025, importet nga BE-ja u rritën me 6.6 për qind.

Partnerët kryesorë të Kosovës për importet nga BE-ja ishin Gjermania, me 13.6 për qind, Italia me 4.2 për qind dhe Polonia me 3.7 për qind./Albinfo.ch