Konferenca në Gjenevë: Të zhdukurit në Kosovë: 20 vjet më vonë, ku jemi?

 Në Gjenevë ka filluar konferenca për të zhdukurit, e cila organizohet në 70-vjetorin e Deklaratës për të Drejtat Themelore të Njeriut

Pothuajse 20 vjet pas luftës në Kosovë dhe 10 vjet pas shpalljes së pavarësisë, familjet ende kërkojnë shpjegime për zhdukjen e të dashurve të tyre. Gjithsej 6,057 njerëz janë shpallur të zhdukur nga KNKK në lidhje me konfliktin që shpërtheu në Kosovë dhe pasojat e tij në vitet 1998-1999. Përderisa procesi i hulumtimit dha rezultate dhe kjo ua lehtësoi vuajtjet familjeve të 4,407 personave, deri më tani nuk është pranuar ndonjë përgjigje për rreth 1,650 persona të zhdukur. Nga këta persona të pagjetur, shumica janë shqiptarë, midis tyre ka edhe një pakicë të serbëve, shkruan albinfo.ch.

Në këtë konferencë në Gjenevë po marrin pjesë Jahja Lluka, drejtor i arkivave për personat e zhdukur dhe këshilltar i Kryeministrit të Republikës së Kosovës, Ibrahim Makolli, shef i delegacionit të Republikës së Kosovës për dialog me serbët lidhur me të zhdukurit dhe Kushtrim Gara, shef i Komisionit qeveritar për personat e zhdukur dhe Drejtori i Institutit të Mjekësisë Ligjore, Arsim Gërxhaliu. Albinfo.ch do të sjell një kronikë më të zgjeruar nga kjo konferencë në Gjenevë.

---