Kompanitë e verës nga Kosova prezantohen në panairin ndërkombëtar “ProWein” në Gjermani

Shtatë kompani kosovare marrin pjesë në një nga panairet më të mëdha globale të industrisë së verës në Düsseldorf

Shtatë kompani nga Kosova po marrin pjesë në panairin ndërkombëtar të industrisë së verës dhe pijeve alkoolike ProWein, i cili po mbahet nga 15 deri më 17 mars 2026 në Düsseldorf të Gjermanisë, transmeton albinfo.ch.

Në këtë panair po prezantohen kompanitë kosovare Stonecastle Vineyards & Winery L.L.C., Kosova Wine, Biopak, Dualos, Suhareka Verari, Bodrumi i Vjetër dhe Agro Vita, të cilat po promovojnë verërat dhe produktet e tyre para profesionistëve të industrisë nga e gjithë bota.

Pjesëmarrja e tyre është mbështetur nga Ministria e Industrisë, Ndërmarrësisë, Tregtisë dhe Inovacionit (MINTI), përmes Agjencia për Investime dhe Përkrahjen e Ndërmarrjeve në Kosovë (KIESA), e cila ka siguruar një hapësirë ekspozuese prej 70 metrash katrorë për prezantimin e produkteve të kompanive vendore.

Gjatë këtij aktiviteti ndërkombëtar, kompanitë kosovare po zhvillojnë takime me blerës, importues dhe përfaqësues të industrisë së verës nga vende të ndryshme të botës, me synimin për të zgjeruar bashkëpunimet dhe për të depërtuar në tregje të reja ndërkombëtare.

ProWein konsiderohet një nga panairet më të mëdha globale në sektorin e verës dhe pijeve alkoolike, me mbi 4,000 ekspozues nga më shumë se 100 vende dhe mbi 42,000 profesionistë të industrisë që marrin pjesë çdo vit. Ky panair shërben si një platformë e rëndësishme për promovimin e produkteve, krijimin e kontakteve dhe zhvillimin e bashkëpunimeve ndërkombëtare.

Pjesëmarrja e kompanive nga Kosova në këtë panair synon të promovojë cilësinë e produkteve vendore dhe të rrisë prezencën e vendit në industrinë ndërkombëtare të verës dhe pijeve alkoolike.

Panairi do të qëndrojë i hapur për vizitorët edhe gjatë ditës së sotme, 17 mars 2026. /Albinfo.ch.

---