Klubi gjerman kërkon dy futbollistë nga Kosova për sezonin e ri

Dy futbollistë nga Kosova në radarët e Union Berlinit

Trajneri Mauro Lustrinelli dëshiron të ribashkohet me dy mesfushorët që ishin ndër arkitektët e suksesit të FC Thun, me synimin për të ndërtuar një skuadër konkurruese në Bundesliga, transmeton albinfo.ch.

Union Berlini po punon për përforcimin e repartit të mesfushës për sezonin e ri, ndërsa në fokusin e klubit gjerman kanë hyrë dy futbollistë që shkëlqyen sezonin e kaluar me FC Thun.

Sipas raportimeve të mediave zvicerane dhe gjermane, trajneri Mauro Lustrinelli, i cili këtë verë mori drejtimin e Union Berlinit, synon të ribashkohet me Valmir Matoshin, reprezentuesin e Kosovës, dhe Kastriot Imerin, reprezentuesin e Zvicrës.

Të dy mesfushorët ishin ndër figurat kyçe të FC Thun gjatë sezonit të kaluar, duke dhënë kontribut të rëndësishëm në suksesin e ekipit. Lustrinelli beson se njohja e tyre me filozofinë dhe sistemin e tij të lojës do ta lehtësonte përshtatjen dhe do t’i jepte ekipit më shumë stabilitet dhe kreativitet në mesfushë.

Valmir Matoshi ishte një nga futbollistët më të spikatur të Thunit gjatë edicionit të kaluar. Mesfushori 26-vjeçar regjistroi 30 paraqitje në kampionat, duke realizuar gjashtë gola dhe tetë asistime, statistika që e kanë bërë një nga emrat më tërheqës në tregun e transferimeve.

Edhe Kastriot Imeri luajti rol të rëndësishëm në mesfushën e Thunit, duke kontribuar me cilësi në organizimin e lojës dhe balancën e ekipit gjatë gjithë sezonit.

Megjithatë, transferimi i dy futbollistëve nuk pritet të jetë i lehtë, pasi ata mbeten nën kontratë me klubet e tyre aktuale. Çdo lëvizje e mundshme do të varet nga negociatat mes klubeve gjatë afatit kalimtar veror./Albinfo.ch

---