KFOR-i konfirmon fillimin e tërheqjes nga ura e Mitrovicës

NATO Kosovo Force - KFOR

Pas raportimeve të ditës së sotme, misioni i NATO-s në Kosovë, KFOR-i, e ka konfirmuar se ka nisur procesin gradual të ndryshimit të pranisë së përhershme në urën kryesore të Mitrovicës, duke e lidhur këtë vendim me përmirësimin e situatës së sigurisë në Kosovë.

Bëhet e ditur se ky proces do të jetë gradual dhe i bazuar në kushte, ndërsa po koordinohet me institucionet e Kosovës, organizatat ndërkombëtare, Policinë e Kosovës dhe EULEX-in.

Tutje nga KFOR-i u tha se pavarësisht ndryshimit të pranisë në urë, misioni do të vazhdojë të mbajë prani të dukshme në jug dhe veri të Mitrovicës, si dhe në pjesët veriore të Kosovës.

“KFOR-i do të vazhdojë kontributin e tij për ruajtjen e një mjedisi të sigurt dhe të qetë për të gjitha komunitetet”, thuhet në përgjigjen për Zërin, transmeton albinfo.ch.

Në kuadër të këtij procesi, sipas KFOR-it, është informuar rregullisht edhe shefi i Shtabit të Përgjithshëm të Forcave të Armatosura të Serbisë, gjenerali Milan Mojsiloviq. Komandanti i KFOR-it, gjeneralmajor Ozkan Ulutash, vijon të jetë në kontakt të ngushtë me institucionet e Kosovës, organizatat ndërkombëtare dhe Forcat e Armatosura të Serbisë.