Këto janë zonat e Zvicrës të goditura më rëndë nga kriza e qirave

Shoqatat e qiramarrësve në Zvicër kanë kritikuar pronarët e banesave që po “përfitojnë” nga rënia e numrit të banesave të lira në tregun zviceran të qirave.

Shifrat e reja kanë zbuluar përmasat e krizës në rritje të banesave me qira në Zvicër, ku numri i pronave të lira po bie, ndërsa projektet e ndërtimit të banesave po bëhen gjithnjë e më të papërballueshme për qiramarrësit me të ardhura të ulëta dhe mesatare.

Sipas shifrave më të fundit nga Zyra Federale e Statistikave (FSO), në qershor të vitit 2026, në Zvicër kishte 45,493 prona të lira.

Kjo shifër përfaqëson 2,962 prona më pak se një vit më parë, një rënie prej 6.1 për qind. Gjithashtu, ra edhe numri i pronave të ofruara për shitje, me 4.1 për qind, duke arritur në 10,803 njësi.

Në një deklaratë për shtyp, shoqata zvicerane e qiramarrësve “Asloca” dënoi mungesën e banesave të lira dhe çmimet e papërballueshme në Zvicër, si për qira ashtu edhe për shitje.

Grupi vlerëson se shumë pronarë po “përfitojnë nga ky treg me ofertë të kufizuar për të kërkuar qira shumë të larta”.

“Asloca” theksoi gjithashtu mungesën e banesave për personat me të ardhura të ulëta ose mesatare.

Sipas organizatës, ndërtimi përqendrohet kryesisht në segmentin e lartë të tregut, raporton thelocal. Për shembull, në Gjenevë, Carouge dhe Écublens, qiraja mesatare mujore për pronat e ndërtuara rishtazi është 50 për qind më e lartë se ajo për ndërtesat ekzistuese.

Megjithatë, kjo është një prirje mbarëkombëtare. Gjatë gjashtë viteve të fundit, numri i banesave të lira në Zvicër ka rënë vazhdimisht.

Shkalla e përgjithshme e disponueshmërisë së pronave me qira ra nga 1.00 për qind në 0.93 për qind brenda një viti, sipas të dhënave të FSO-së, transmeton albinfo.ch.

Kjo rënie prek gjashtë rajone kryesore të Zvicrës. Vetëm rajoni i Cyrihut regjistroi një rritje, duke u ngjitur me 0.04 pikë përqindjeje në 0.52 për qind.

Në rajonin e Liqenit të Gjenevës kishte 7,624 shtëpi të disponueshme, që përfaqëson një shkallë disponueshmërie prej vetëm 0.77 për qind.

Ka dallime të konsiderueshme midis kantoneve.

Zug-u ka shkallën më të ulët në vend, me 0.20 për qind, i ndjekur nga Gjeneva (0.31 për qind) dhe Obwalden-i (0.38 për qind). Në total, 15 kantone kanë një normë më të ulët se 1 për qind.

Në anën tjetër të spektrit, kantoni Jura ka normën më të lartë, me 3,35 për qind, i ndjekur nga Solothurn-i me 1,91 për qind.

Së fundmi, është shënuar një rënie për të gjitha madhësitë e pronave. Kjo rënie ishte proporcionalisht më e madhe te apartamentet me dy dhoma, me një ulje prej 8,5 për qind.

Apartamentet me tri dhoma mbeten më të shumtat në tregun zviceran, me 13.691 njësi, të ndjekura nga ato me katër dhoma, numri i të cilave ishte 11.929.

---