Kërkohet stimulim për bujqit që mbajnë lopë me brirë!

Iniciatorët kërkojnë që shteti të subvencionojë bujqit dhe blegtorët të cilet mbajnë lopë me brirë, sepse kjo do të vlerësohej si trajtim më human i kafshëve të përmendura

Zviceranët me të drejtë vote do të kenë së shpejti rastin që të votojnë për një iniciativë të llojit të veçantë. Një grup iniciator ka mbledhur 120.859 nënshkrime për iniciativën e quajtur shkurt «të lopëve me brirë», ose me emërtimin e plottë «Për dinjitetin e kafshëve të dobishme në bujqësi». Mbetet që iniciativën ta vlerësojë dhe lejojë kancelaria federale.

Iniciatorët kërkojnë që shteti të subvencionojë bujqit dhe blegtorët të cilet mbajnë lopë, dele ose dhi me brirë, sepse kjo do të vlerësohej si trajtim më human dhe më afër natyrës i kafshëve të përmendura. Fjala është që të stimulohen materialisht ata blegtorë ose ato kompani që nuk ua prejnüe brirët kafshëve të tyre.

Fshatarët në Zvicër ua heqin brirët lopëve në radhë të parë për të ulur rrezikun nga lëndimet por edhe për shkaqe ekonomike sepse lopët me brirë zënë hapësirë më të madhe në shtallat e tyre.

Rreth tri të katërtat e lopëve qumështore në Zvicër janë pa brirë.