Kasami: Diaspora është partner strategjik për zhvillimin e Tetovës

Në kuadër të manifestimit “Tetova n’festë”, u organizua paneli “Diaspora dhe Tetova: Mes demografisë, kulturës dhe potencialit”.

Kryetari i Komunës së Tetovës, Bilall Kasami, ka theksuar rëndësinë e diasporës si një faktor kyç në zhvillimin e qytetit, gjatë një paneli diskutimi të mbajtur në kuadër të manifestimit “Tetova n’festë”, transmeton albinfo.ch.

Paneli me temën “Diaspora dhe Tetova: Mes demografisë, kulturës dhe potencialit” mblodhi akademikë, sociologë, profesionistë dhe sipërmarrës të suksesshëm nga mërgata shqiptare, të cilët diskutuan për sfidat dhe mundësitë që ofron diaspora për zhvillimin e Tetovës.

Sipas Kasamit, diskutimet u zhvilluan në dy sesione, ku fillimisht u trajtuan çështjet që lidhen me migrimin, kulturën dhe demografinë, ndërsa më pas fokusi u vendos te kapitali intelektual, biznesi dhe kontributi i diasporës.

Ai theksoi se takimi shërbeu si një mundësi për të dëgjuar idetë dhe përvojat e mërgimtarëve, si dhe për të identifikuar mënyra konkrete për përfshirjen e tyre në zhvillimin e Tetovës.

“Tetova është e plotë vetëm kur jemi bashkë me diasporën tonë”, u shpreh Kasami, duke shtuar se mërgimtarët janë partnerë strategjikë, ambasadorë dhe udhërrëfyes në rrugëtimin drejt zhvillimit të qytetit.

Në fund, ai falënderoi panelistët dhe të gjithë pjesëmarrësit për kontributin në debatin që, sipas tij, ndihmon në ndërtimin e urave të bashkëpunimit mes Tetovës dhe diasporës./Albinfo.ch

---