Kapet sasi rekorde e heroinës, 24 kg., me vlerë tregu 3 milionë euro

Pika doganore Basel-Weil am Rhein ndodhet në territorin gjerman dhe për këtë arsye dogana zvicerane ia ka kaluar rastin autoriteteve gjermane

Doganierët e Zvicrës dhe të Gjermanisë kanë kapur javën e kaluar një sasi rekorde droge të llojit të heroinës. 24 kilogramë ka qenë preja e konfiskuar në dy kamionë që po vinin nga Gjermania në Zvicër  e të cilët janë ndaluar në vendkalimin kufitar Weil am Rhein, shkruan blick.ch.

Doganierët zviceranë, të martën e kaluar i kanë ndaluar kamionët duke dashur t`i kontrollojnë nga ana teknike. Por, gjatë kontrollimit ata kanë parë se akset e të dy makinave kanë qenë të manipuluara gjegjësisht aty janë gjetur kanale që të shpienin në brendi të tyre, transmeton albinfo.ch. Aty pastaj është gjetur heroina që ka një vlerë tregu prej 3 milionë eurosh.

Pika doganore Basel-Weil am Rhein ndodhet në territorin gjerman dhe për këtë arsye dogana zvicerane ia ka kaluar rastin autoriteteve gjermane. Ndërkohë, në hetimin e rastit është inkuadruar një grup aksioni i Zyrës Federale të Kriminalistikës, një ekip i specializuar për hulumtime të këtij lloji.

Në njërin kamion ata kanë gjetur 19 kilogramë heroinë dhe në tjetrin, 5 kilogramë, të ndarë në 64 pako të vogla.

Të dy shoferët e kamionëve janë në burgun hetues.