Lajme

Kantonet zvicerane mendojnë t’i ulin taksat për të pasurit

Ministri zviceran i Financave, Ueli Maurer, ka lënë të kuptohet se kantonet mund të ulin taksat mbi të ardhurat për drejtuesit e mirë të kompanive e koorporatave, përderisa vendi po përgatitet për ndikimin e një norme minimale tatimore të korporatave, përcjell albinfo.ch.

Duke folur për gazetën NZZ am Sonntag, Maurer tha se kantonet po diskutojnë idenë e reduktimit të normave të larta për ata që fitojnë shumë.

Ashtu si në shumë vende, njerëzit paguajnë norma progresive më të larta në Zvicër kur të ardhurat e tyre arrijnë një nivel të caktuar.

“Mund ta imagjinoj fare mirë se disa kantone do të rrafshojnë paksa progresionin e taksave për t’u bërë më tërheqës për punonjësit me të ardhura të larta”, tha Maurer të dielën.

Megjithatë, ai theksoi se ky është një vendim për kantonet individuale dhe jo për qeverinë. Kjo sigurisht duket të jetë një mundësi në kantonin Zug, i cili është shtëpia e shumë kompanive shumëkombëshe. Ulja e taksave mbi të ardhurat në këtë mënyrë do të ishte “një mënyrë e mirë për ta mbajtur Zugun si një vend tërheqës”, tha për gazetën drejtori i financave të kantonit Zug, Heinz Tännler, përcjell tutje albinfo.ch.