Itali: Arrestohet 36-vjeçari shqiptar, dyshohet se i vuri flakën banesës së ish-partneres

Ngjarja ndodhi në “Corso Ho Chi Min”, ku zjarri shkaktoi dëme të mëdha materiale, ndërsa dy persona përfunduan në spital jashtë rrezikut për jetën.

Një incident i rëndë është regjistruar në Itali, ku autoritetet kanë arrestuar një 36-vjeçar shqiptar, i dyshuar për zjarrvënie në apartamentin e ish-partneres së tij, transmeton albinfo.ch.

Sipas raportimeve, i dyshuari dyshohet se ka përdorur lëndë djegëse, pas një konflikti të fundit me ish-partneren, duke i vënë flakën banesës së saj.

Ngjarja ka ndodhur disa ditë më parë në zonën “Corso Ho Chi Min”, duke shkaktuar dëme të konsiderueshme materiale.

Si pasojë e incidentit, të dy personat janë lënduar dhe janë dërguar për trajtim mjekësor në spitalin Guzzardi, ku sipas informacioneve, ndodhen jashtë rrezikut për jetën.

Pas daljes nga spitali, autori i dyshuar është dërguar në burgun e Raguzës, ku po mbahet nën mbikëqyrjen e autoriteteve gjyqësore.

Hetimet paraprake sugjerojnë se konflikti i vazhdueshëm mes çiftit dhe ndarja, të cilën i dyshuari nuk e pranonte, mund të kenë qenë arsyeja kryesore e kësaj ngjarjeje./Albinfo.ch

---