Ish-shefi i “Starbucks” mund të garojë për president të SHBA-së

Ish-shefi ekzekutiv i zinxhirit të restoranteve “Starbucks” tha se po e shqyrton seriozisht kandidimin për president të Shteteve të Bashkuara.

Howard Schultz, i cili ka dhënë dorëheqje nga posti në “Starbucks” vitin e kaluar, tha se po konsideron të garojë si kandidat i pavarur i qendrës në vitin 2020, shkruan REL, përcjell albinfo.ch.

Në disa postime në Twitter, Schultz tha se dy partitë më të mëdha politike në SHBA “janë më të ndara se kurrë”.

“Le të diskutojmë se si mund të bashkohemi për të krijuar mundësi për më shumë njerëz”, tha ai.

Në një intervistë për CBS-in, Schultz tha se ka qenë “demokrat i përjetshëm”, por e kritikoi sistemin aktual të dominuar nga dy parti.

Presidenti i SHBA-së, Donald Trump, iu përgjigj komenteve të tij me një postim në Twitter, duke thënë se “Schultz nuk e ka guximin për të garuar për president”.