Irlanda u sugjeron qytetarëve të saj të evitojnë Zvicrën, nga rreziku i terrorizmit!

Zvicra është e rrezikshme sikur Brazili, Kameruni, apo Afrika e Jugut! Nuk ka rëndësi pse në ndonjërin nga këto vende shkalla e vrasjeve është 30 herë ose madje dhe 45 herë më e lartë se ajo në Zvicër. Për Ministrinë e Jashtme të Irlandës Zvicra hyn në listën e vendeve me rrezik nga terrorizmi dhe për këtë arsye ajo u rekomandon qytetarëve irlandezë që ta evitojnë udhëtimin në Zvicër ose nëse patjetër duhet të udhëtojnë, atëherë të kenë kujdes të veçantë!

Por çfarë e ka shtyrë Qeverinë e Irlandës të veprojë kështu?

Sipas një raportimi të televizionit të Zvicres Frankofone (RTS), Irlandës i ka shërbyer si shkas për një klasifikim të tillë skandaloz të Zvicrës një aksion antiterrorist i policisë zvicerane gjatë dhjetorit të vitit të kaluar në Gjenevë, transmeton albinfo.ch. Me atë rast kishte pasur paralajmërime se po përgatitej një sulm terrorist në këtë qytet dhe shkalla e gatishmërisë së autoriteteve të sigurisë ishte ngritur lart.

Ministria e jashtme e Irlandës e kishte përpiluar listën e vendeve me rrezik terrorist pikërisht ato ditë. Ndërkohë, shumë shpejt, Gjeneva e kishte hequr masën e sigurisë pasi që rreziku ishte tejkaluar, por lista e Irlandës kishte mbetur pa u ndryshuar. Si rezultat, Zvicra tash, shikuar nga perspektiva irlandeze, figuron në një shoqëri jo shumë te mirë sa i përket shkallës së sigurisë.