Hiqet eksplozivi nga urat, një “kujtim” i Luftës së Ftohtë

Bëhet fjalë për masat mbrojtëse ndaj invazionit të mundshëm sovjetik që ushtria zvicerane ka vendosur në ato ura gjatë kohës së Luftës së Ftohtë

Me miliona kalimtarë, zviceranë dhe të tjerë kanë kaluar mbi urat që lidhin Zvicrën me Gjermaninë, në kufijtë që kalojnë nëpër lumenj. Por rrallëkush e ka ditur se në këmbët e urave në fjalë ka pasur qindra kilogramë të eksplozivit!

Bëhet fjalë për masat mbrojtëse që ushtria zvicerane ka vendosur në ato ura gjatë gjithë kohës së Luftës së Ftohtë dhe madje edhe më vonë. Vetëm në muajin tetor të këtij viti më në fund janë ”pastruar” të gjitha urat nga eksplozivi që ishte dedikuar në radhë të parë për tanket e Paktit të Varshavës të udhëhequr nga ish Bashkimi Sovjetik që shiheshin si rrezik për Zvicrën e që mund të vinin përmes territorit gjerman.

Po të ndodhte një gjë e tillë, urat do të eksplodonin, natyrisht, pasi që masa eksplozive të lidhej me fitilin, i cili ishte i vendosur i veçuar nga eksplozivi.

Është interesante se pajisje të tilla me materie shpërthyese janë vendosur në disa raste deri vonë, shumë vite pas përfundimit të luftës së ftohtë. Së fundi ka ndodhur në vitin 2006, kur ura nëpër të cilën kalon autostrada në Rheinfelden, kantoni Aargau, ishte pajisur me eksploziv!