Hapen xhamitë në Zvicër, rregullat që duhet t’i respektojnë myslimanët

Nga sot hapen xhamitë në Zvicër. Sipas vendimit të qeverisë zvicerane është lejuar që të kryhen aktivitete fetare nëpër faltoret – xhamitë, por me kushte të veçanta.

Kushtet të cilat kërkohen në rregulloren janë strikte, pa asnjë përjashtim, përndryshe rrezikohet ndonjë gjobë të lartë nga autoritetet apo edhe mbyllje të xhamisë, shkruan albinfo.ch.

Xhamitë do të rihapen me datën 28.05.2020, ditë e enjte. Në fillim do të falen vetëm 3 namaze ditore, namazi i mëngjesit, drekës dhe namazi i  mbrëmjes (Akshamit). Kjo është një rihapje graduale që secili nga ne të adaptohet me rregullat e reja.

Namazi i xhumasë më 29.05.2020 nuk do të falet në asnjë xhami shqiptare, kurse më 05.06.2020 është në pikëpyetje.

Rregullat:

Hyrja në xhami lejohet vetëm pas regjistrimit dhe të dhënave personale si:

Emri dhe mbiemri

Adresa

Numri i telefonit

Nga çdo vizitor i xhamisë kërkohet që të ruajë distancën prej 2 metrash gjatë hyrjes në xhami, gjatë daljes nga xhimia si dhe gjatë qëndrimit në të.

Çdo vizitor i xhamisë obligohet që të ketë maskë mbrojtëse para se të futet në xhami.

Personi që nuk posedon maskë mbrojtëse, nuk lejohet të fetet në xhami.

Çdo vizitor i xhamisë obligohet të marrë me vete një sexhade (tepi për falje) para se të futet në xhami.

Personi që nuk posedon sexhade (tepi për falje) nuk lejohet të futet në xhami.

Çdo vizitor i xhamisë obligohet t’i dezinfektojë duart me dezinfektues në hyrje të xhamisë. (Desinfektionsmittel gjendet në xhami).

Koha e qëndrimit në xhami është e kufizuar.

Hyrja në xhami mund të fillohet gjysmë ore para namazit dhe të dilet jashtë menjëherë pas namazit.

Qëndrimi në xhami për biseda private nuk është i lejuar.

Çdo vizitor i xhamisë këpucët e tij duhet t’i fusë në një qese plastike dhe t’i vendosë në këndin e këpucëve në hyrje të xhamisë.

(Qeset e plastikës i shpërndanë xhamia)

Pas çdo falje të namazit, përgjegjësit e xhamisë obligohen që ta bëjnë ajrosjen dhe dezinfektimin e ambientit të xhamisë.

Secili vizitor i xhamisë, i cili dëshiron të falet në xhami, duhet me marrë abdest në shtëpinë – banesën e tij.

Abdes-hanja (vendi i abdestit) dhe WC mbesin të mbyllura, për shkaqe higjiene, deri në një afat të pacaktuar.

Fëmijët nën moshën 12-vjeçare nuk lejohen të futen në xhami. Kurse vizitorët mbi moshën 65-vjeçare preferohet të qëndrojnë nëpër banesat e tyre dhe të vazhdojnë me  namazet nëpër banesat e tyre.

Personat që kanë simptoma të ndonjë smundje apo gripi obligohen të qëndrojnë nëpër banesat e tyre, e të mos përzihen me të tjerët.

Pas daljes nga xhamia secili vizitor është i obliguar që maskën mbrojtëse dhe qesen e plastikës t’i marrë me vete dhe të kujdeset vetë për hedhjen në shportën e mbeturinave.

---