Shkolla Shqipe “Abetarja” në Gjermani përmbyll me sukses vitin e parë shkollor

Konsullata e Kosovës në Shtutgart ndau certifikatat për nxënësit dhe vlerësoi kontributin e mësuesve, prindërve dhe koordinatorëve në ruajtjen e gjuhës shqipe

Shkolla Shqipe “Abetarja” në Leinfelden-Echterdingen të Gjermanisë ka përmbyllur me sukses vitin e saj të parë shkollor, duke organizuar ceremoninë e shpërndarjes së certifikatave për nxënësit, transmeton albinfo.ch.

Në këtë aktivitet mori pjesë udhëheqësi i Konsullatës së Republikës së Kosovës në Shtutgart, Hamdi Bërbatovci, i cili ua dorëzoi certifikatat nxënësve dhe përgëzoi ata për përkushtimin e treguar në mësimin e gjuhës shqipe.

Me këtë rast, Bërbatovci vlerësoi angazhimin e mësueseve Mirjetë Gashi dhe Antigona Hoxha Sopa, koordinatorit Fitim Gashi, si dhe Këshillit të Prindërve për kontributin e tyre në organizimin dhe funksionimin e shkollës.

Ai theksoi se ruajtja e gjuhës amtare te fëmijët e diasporës është një mision me rëndësi të veçantë dhe ritheksoi mbështetjen e vazhdueshme të Konsullatës së Kosovës për nisma që forcojnë identitetin kombëtar përmes arsimit në gjuhën shqipe.

Në fund të ceremonisë, prindërve dhe nxënësve iu uruan pushime të mbara verore dhe një qëndrim sa më të këndshëm në Kosovë./Albinfo.ch

---