Greva paralizon aeroportet në Gjermani

Nga anulimet në aeroportin e Frankfurtit u goditën edhe aeroportet e Mynihut, Dyseldorfit, Shtutgartit, Këln-Bonit dhe Hanoverit

Me qindra fluturime janë anuluar në Gjermani, pasi stafi i aeroporteve shpalli një grevë të përgjithshme të martën, pas mosrealizimit të disa kërkesave të tyre të njëpasnjëshme për rritjen e pagave.

“Lufthansa” ishte detyruar të anulonte mbi 400 fluturime, që do të niseshin nga aeroporti më i madh i Gjermanisë, Frankfurti.

Greva e punonjësve të aeroportit është pjesë e një lëvizje më të gjërë nga të gjitha sindikatat e punëtorëve të sektorëve publikë, përpara bisedimeve që do të mbahen me autoritetet më vonë gjatë javës.

Sindikata e punëtorëve të transportit dhe shërbimeve, me një total prej dy milionë antarësh, kërkon një rritje rroge prej 6,5% për të gjithë punëtorët e saj.

Mediat gjermane raportuan se 1/3 e fluturimeve të planifikuara u bllokuan në Frankfurt, ndërsa nga anulimet u goditën edhe aeroportet e Mynihut, Dyseldorfit, Shtutgartit, Këln-Bonit dhe Hanoverit.

Në negociatat e mëparshme, punëtorët refuzuan ofertën e autoriteteve për një rritje prej vetëm 3,3% të pagës në 24 muajt e ardhshëm. Bisedimet mes të dy palëve do të vazhdon ditën e mërkurë.