Granatimet ruse vrasin 32 civilë në Kherson

Keystone (AP Photo/ (AP Photo/Rodrigo Abd)

Të paktën 32 persona në jug të Ukrainës në rajonin Kherson janë vrarë gjatë granatimeve ruse, ka njoftuar shefi i policisë ukrainase.

Forcat ruse përfunduan tërheqjen nga qyteti i Khersonit më 11 tetor, pas gati nëntë muajve okupim, raportojnë mediat ndërkombëtare.

Tani janë pozicionuar në brigjet në lindje të Dnipros, nga ku vazhdimisht bombardojnë qytetin.

“Rusët çdo ditë granatojnë qytetin dhe vrasin banorët e atjeshëm. Në total Rusia vrau 32 civilë në rajonin e Khersonit që nga tërheqja nga ky qytet”, tha kreu i policisë, Ihor Klimenko.

“Shumë banorë po evakuohen duke kërkuar vendstrehim në pjesët më të qeta në Ukrainë. Por, shumë të tjerë po qëndrojnë nëpër shtëpitë e tyre dhe duhet t’u ofrojmë siguri”, shtoi ai.

Javën e kaluar një zyrtar i lartë ukrainas ka bërë të ditur se autoritetet e atjeshme do të fillojnë me evakuimin e atyre që duan të largohen nga ky rajon.

Klimenko gjithashtu tha se hetuesit kanë regjistruar të paktën 578 krime të luftës që i kryen trupat ruse, derisa Moska në mënyrë rutinore i mohon akuzat se civilët janë objektiv i forcave të tyre.