Gjykata i jep të drejtë rastit social: Mund të mbajë veturën!

Ai ka bërë ankesë në Gjykatën Administrative të kantonit, në Liestal dhe kjo gjykatë ia ka dhënë të drejtën që të mos e dorëzojë makinën përkundër faktit se ligji i ri nuk e lejon këtë

Një personi të varur nga ndihmat sociale, i cili jeton në fshatin Zuitgen të Kantonit Baselland, përkundër ligjit në fuqi, i është mundësuar ta mbajë veturën që e ka pasur. Atij më parë i ishte tërhequr vërejtja nga zyra sociale se nëse do që të mbajë makinën do t`i ulet shuma e ndihmës sociale, shkruan srf.ch.

Por ai ka bërë ankesë në Gjykatën Administrative të kantonit, në Liestal dhe kjo gjykatë ia ka dhënë të drejtën që të mos e dorëzojë makinën por ta mbajë, transmeton albinfo.ch.

Personi për të cilin bëhet fjalë është prej dhjetë vitesh i papunë. Por gjatë fundjavave ai argëton njerëzit rrugëve si një artist amator. Së shpejti ky person do të jetë dhe pronar firme dhe për të gjitha këto, pasja e një automjeti është e domosdoshme për të, sipas tij.  Përkundër këtij arsyetimi, qendra për ndihma sociale i kishte kërkuar atij që të dorëzonte numrat e automjetit ndërsa gjykata i dha në fund të drejtë atij dhe jo qendrës sociale.

Edhe pse që nga 1 janari 2016 vepron një ligj i ri që kërkon dorëzimin e makinës në rastet e tilla, gjykata është detyruar të mbështetet në ligjin e vjetër, përcjell albinfo.ch. Në bazë të atij ligji nuk është e ndaluar që një pjesë të parave të ndihmave sociale personi konkret t`i investojë në automobil në vend se në veshmbathje ose ushqim.

Gjyqtarët në Liestal kanë theksuar se ky rast nuk mund të merret si precedent. Secili rast duhet të shqyrtohet individualisht.