Gjermania thotë se Serbia duhet të përafrohet me politikat e BE-së nëse dëshiron të anëtarësohet

Gjermania tha të martën se ka parë njoftimet se Serbia mori raketa kineze tokë-ajër, duke paralajmëruar se pret që vendi ballkanik të përafrojë politikën e tij të jashtme me Bashkimin Evropian, nëse dëshiron të bëhet pjesë e këtij blloku.

Mediat raportuan se avionët ushtarakë kinezë transportuan javën e kaluar në Beograd sistemin e mbrojtjes raketore tokë-ajër FK-3, të ngjashëm me sistemin S-300 të Rusisë ose Patriot të Shteteve të Bashkuara.

Autoritetet serbe nuk konfirmuan se ka ndodhur dorëzimi i sistemeve.

Beogradi pagoi për raketat FK-3 dhe dronët luftarakë CH-92A të Kinës në vitin 2019, duke e bërë Serbinë operatorin e tyre të parë në Evropë.

“Si çështje parimore, pritshmëria e qeverisë federale nga të gjithë kandidatët për anëtarësim në BE është që ata t’i bashkohen politikës së Jashtme dhe të Sigurisë së Bashkimit Evropian dhe në këtë mënyrë të afrohen gjithnjë e më shumë me BE-në”, tha Zyra Federale e Shtypit e Gjermanisë.

Presidenti i Serbisë, Aleksandar Vuçiç, duke folur në një stërvitje ushtarake në fundjavë, pranoi se ka në plan të paraqesë “krenarinë më të re” të ushtrisë së së Serbisë këtë javë, pa dhënë hollësi.

Serbia po balancon aspiratat e saj evropiane dhe partneritetin me NATO-n, me aleancën e saj shekullore fetare, etnike dhe politike me Rusinë.

Ministrja e Jashtme gjermane, Annalena Baerbock, të hënën përsëriti thirrjet që Serbia t’u bashkohet BE-së, Shteteve të Bashkuara dhe vendeve të tjera në vendosjen e sanksioneve ndaj Rusisë për shkak të agresionit të saj në Ukrainë.

Beogradi ka votuar kundër Rusisë tri herë në Kombet e Bashkuara, por nuk ka vendosur sanksione kundër saj.

“Nëse dëshironi të bëheni anëtare e BE-së, gjë që Serbia e dëshiron, atëherë është thelbësore që në momente të tilla t’i bashkoheni politikës së jashtme të BE-së dhe sanksioneve…”, tha ministrja Baerbrock.

Ushtria e Serbisë mbështetet në teknologjinë ish-sovjetike dhe Rusia është një nga furnizuesit kryesorë të saj. Beogradi është gjithashtu i varur nga furnizimet me gaz dhe naftë nga Rusia.

Perëndimi është i shqetësuar se blerjet e armëve nga Kina dhe Rusia mund të kontribuojnë në ndikimin e tyre në rajonin e tensionuar të Ballkanit, i cili ende po rimëkëmbet nga luftërat shkatërruese të viteve të 90-ta.

Të hënën, presidenti serb Vuçiç i tha agjencisë së lajmeve Reuters se Serbia planifikon të blejë një duzinë avionësh luftarakë francezë Dassault Rafale, një lëvizje që nga ekspertët është parë si një shenjë e distancimit të Beogradit nga Rusia.

Kina ka investuar miliarda euro në Serbi, kryesisht në kredi të buta, projekte infrastrukturore dhe energjetike./VOA

---