Gjermania do të hapë llogari pensioni për çdo fëmijë nga mosha 6-vjeçare

Nga viti 2026, shteti gjerman do të nisë një nismë të re pensionale për fëmijët që ndjekin shkollën, duke vendosur çdo muaj nga 10 euro në një llogari të veçantë pensioni për secilin prej tyre.

Ky program, i quajtur “pensioni me fillim të hershëm” (Frühstart-Rente), është pjesë e marrëveshjes së koalicionit mes Unionit konservator dhe Socialdemokratëve, dhe synon të nxisë kursimin për pleqëri që në moshë të vogël.

Si funksionon?

Fëmijët nga mosha 6 deri në 17 vjeç që ndjekin shkollën në Gjermani do të përfitojnë 10 euro çdo muaj në një llogari pensioni personale.

Paratë do të jenë të pa taksueshme dhe nuk do të jenë të disponueshme deri në moshën e daljes në pension.

Pas moshës 18-vjeçare, shteti nuk do të bëjë më pagesa, por prindërit ose vetë të rinjtë mund të vazhdojnë kontributet me dëshirë, transmeton albinfo.ch.

Llogaritë do të jenë të mbrojtura nga ndërhyrjet e shtetit.

Sa mund të përfitohet?

Në 12 vite, një fëmijë do të ketë përfituar 1,440 euro pa përfshirë interesin.

Sipas përllogaritjeve të Sparkasse, nëse investimi sjell një fitim mesatar prej 8% në vit, kjo shumë mund të rritet në:

107,000 euro në moshën e pensionit (67 vjeç) pa kontribute shtesë.

Deri në 175,000 euro nëse kontribuohet vazhdimisht me 10 euro në muaj pas moshës 18.

Dilemat dhe kritikat

Ekspertët financiarë shprehen skeptikë për ndikimin real të nismës në edukimin financiar të të rinjve.

Johannes Geyer nga DIW Berlin tha se kur paratë jepen pasivisht, nuk përmirësohet domosdoshmërisht aftësia për të menaxhuar financat.

Christoph Schmidt nga Instituti RWI e cilësoi idenë si “me qëllim të mirë”, por me përfitime të kufizuara praktike.

Megjithatë, shumë prindër dhe fëmijë do ta mirëpresin këtë gjest si një hap pozitiv për të ardhmen.

 

 

---