Gjermania dënon dhunën në veri të Kosovës

Mësohet se pas zhvillimeve të fundit në Mitrovicën veriore, Ministria e Punëve të Jashtme e Gjermanisë ka dënuar sulmet ndaj KFOR-it në veri të Kosovës, ku janë lënduar disa persona. “Dënojmë ashpër sulmet e dhunshme të papranueshme në veri të Kosovës, ku janë plagosur dhjetëra ushtarë të KFOR/NATO-s dhe disa civilë. Mendimet tona janë me të lënduarit, të cilëve u urojmë shërim të shpejtë”, thuhet në komunikatën e MPJ-së së Gjermanisë, përcjell albinfo.ch.

“Bëjmë thirrje për ndalimin e menjëhershëm të çdo dhune dhe të çdo veprimi që ndez tensionet. Depërshkallëzimi tani nevojitet urgjentisht. Ne u bëjmë thirrje Kosovës dhe Serbisë që të angazhohen në bisedime për këtë qëllim, pa ndonjë vonesë të mëtejshme dhe të vazhdojnë të punojnë në zbatimin e Marrëveshjes për normalizim, të arritur në shkurt dhe mars, duke përfshirë edhe formimin e Asociacionit të Komunave me Shumicë Serbe”, theksohet në këtë komunikatë.

Ministria e Jashtme e Gjermanisë shton se mbështet plotësisht Përfaqësuesin Special të BE-së Miroslav Lajçak në përpjekjet e tij për të ulur tensionet.