Gjermania dëbon 25 shtetas të Kosovës për qëndrim të parregullt

@unsplash

Gjermania ka dëbuar 25 shtetas të Kosovës për shkak të qëndrimit të tyre të parregullt në territorin gjerman. Lajmi është konfirmuar nga Ministria e Punëve të Jashtme dhe e Diasporës (MPJD), e cila ka bërë të ditur për gazetën KOHA se kthimi i tyre është realizuar më 26 maj 2025, transmeton albinfo.ch.

“Nga shteti i Gjermanisë në Republikën e Kosovës, më datë 26 maj 2025 janë kthyer 25 persona. Ata janë kthyer për shkak të qëndrimit të parregullt në Republikën Federale të Gjermanisë”, thuhet në njoftimin e MPJD-së.

Dëbimet janë pjesë e një politike më të rreptë migracioni që po zbatohet nga autoritetet gjermane. Deputeti gjerman i Unionit Demokristian (CDU), Gunter Krings, ka deklaruar se Gjermania ka nevojë për më shumë masa të tilla.

“Ne duhet t’i intensifikojmë këto fluturime, por duam t’u japim mbrojtje atyre që kanë nevojë për të. Por, edhe t’i deportojmë ata që s’kanë nevojë për këtë mbrojtje, e kanë humbur të drejtën, apo kanë kryer akte të dhunës”, është shprehur Krings, i cili është nënkryetar i grupit parlamentar të CDU-së, transmeton albinfo.ch.

Sipas tij, përveç shtetasve nga Kosova, janë dëbuar edhe rreth 50 shtetas të Shqipërisë gjatë ditëve të fundit.

Autoritetet gjermane kanë paralajmëruar se do të vazhdojnë me kthimet e detyrueshme për të gjithë personat që nuk plotësojnë kushtet ligjore për të qëndruar në vend, transmeton albinfo.ch.