Gjeneva i përgjigjet Erdoganit: Nuk e heqim fotografinë!

"Ekzekutivi i qytetit të Gjenevës qëndron mbrapa kësaj ekspozite. Prandaj, heqja e fotografisë as që mund të diskutohet”

Qyteti i Gjenevës nuk do të lejojë të ndikohet nga Turqia në marrjen e vendimeve të veta dhe as që diskutohet fare heqja e fotografisë me tekst kritik ndaj Erdoganit. Kështu ka deklaruar për emisionin “Tagesschau” të SRF,  përfaqësuesi i ekzekutivit të qytetit, Guillaume Barazzone.

“Gjeneva dhe Zvicra përkrahin lirinë e mendimit. Dhe pikërisht këtë po e bëjnë edhe në Sheshin e Pallatit të Kombeve në Gjenevë, në të cilin pakicat kanë mundësinë që përmes demonstratave të shprehin shqetësimet e tyre. Për këtë arsye ekzekutivi i qytetit të Gjenevës qëndron mbrapa kësaj ekspozite. Prandaj, heqja e fotografisë as që mund të diskutohet”, ka thënë Barazzone.

Siç është raportuar dje (edhe në albinfo.ch) Turqia ka kërkuar nga administrata e qytetit të Gjenevës që të heqë një fotografi nga një tablo e një ekspozite. Bëhet fjalë për fotografinë të cilën e ka realizuar fotografi nga Gjeneva, Demir Sönmez, me prejardhje kurde-armene, në vitin 2014. Në atë fotografi kërkohej përgjegjësi nga kryeministri i atëhershëm (e presidenti i sotëm) i Turqisë, Recep Tayyip Edogan për vrasjen e një të riu në një aksion proteste në Stamboll, transmeton albinfo.ch.

I riu në fjalë pati vdekur pasi që ishte qëlluar në kokë nga një bombë me gaz lotsjellës.

Ndërsa fotografia e përmendur është pjesë e një ekspozite prej 58 pamjesh që po mbahet para selisë së OKB-së në Gjenevë.