Gjendet kufoma e vogëlushit shqiptar të zhdukur në lumin Reuss

Tiani pesëvjeçar bashkë me familjen e tij ishin përfshirë në një aksident në lumin Reuss të shtunën, kur ishin në një gomone

Katër ditë nga zhdukja dhe pas tri ditë kërkimesh intensive është gjetur kufoma e vogëlushit pesëvjeçar shqiptar Tian Rahimi. Këtë njoftim e dhanë për albinfo.ch burime nga vullnetarët që ishin angazhuar në kërkim të tij.

Një trup u gjet në lumin Reuss pranë Merenschwand të martën pasdite. Kathrin Wettstein, zëdhënëse për median e Policisë Kantonale të Aargau, e konfirmoi këtë .

Shërbimet e emergjencës dhe vullnetarët kishin kërkuar përgjatë lumit Reuss gjatë gjithë ditës për një djalë pesëvjeçar që ishte zhdukur që nga e shtuna.

A është trupi i djalit të zhdukur? Zëdhënësja e policisë Wettstein nuk mundi ta konfirmonte këtë, por tha se probabiliteti ishte shumë i lartë. Ajo njoftoi se informacioni i konfirmuar do të ishte i disponueshëm të mërkurën në mëngjes. Ndihmësit i thanë Blick se personi i gjetur ishte me të vërtetë djali, përcjell albinfo.ch. Familja e tij gjithashtu shkoi në vendngjarje.

Familja e fëmijës ka kaluar disa ditë dramatike. Të shtunën, ata u përfshinë në një aksident ndërsa ishin në lumin Reuss pranë Mühlau në një gomone. Varka u përplas me një pemë që ndodhej në ujë dhe u përmbys. Prindërit dhe motra shtatëvjeçare arritën të notonin deri në breg. Pesëvjeçari është zhdukur që atëherë.

Ekipet e shpëtimit kanë kërkuar vazhdimisht djalin me një kontingjent të madh personeli të angazhuar. Përveç patrullave të policisë, në kërkim morën pjesë edhe dronë, anije, një helikopter shpëtimi, zjarrfikësit dhe zhytës të policisë.

Lexoni po ashtu:

Vullnetarë të shumtë po ndihmojnë në kërkimin e 5 vjeçarit shqiptar, në lumin Reuss

 

---