Gjendet arsenal i madh armësh te një shtetas italian

Policia Kantonale e Tesinës ka arrestuar të enjten një shtetas italian me qëndrim në regjionin e Luganos, me dyshimin se ka bërë shkelje të rëndë të ligjit mbi armëmbajtjen.

Në banesën e italianit janë gjetur 40 armë zjarri, një numër armësh të ftohta dhe 130 kilogramë municion. Siç bën të ditur policia, personi në fjalë nuk ka pasur dëshmi për posedimin e armëve dhe municionit dhe as çfarëdo leje për to.

Me rastin e një bastisjeje tjetër në po këtë regjion, policia ka konfiskuar te një tregtar armësh edhe rreth 130 armë zjarri, një granatë të ushtrisë zvicerane dhe një taser (armë elektroshok).