FSHF vazhdon kërkimin e talenteve në diasporë: “Open Stage” më 27 qershor në New York

FSHF po vijon punën për identifikimin dhe afrimin e futbollistëve shqiptarë që jetojnë dhe aktivizohen jashtë vendit, duke e konsideruar këtë një prioritet të rëndësishëm për forcimin e ekipeve kombëtare.

Në këtë kuadër, Federata Shqiptare e Futbollit do të organizojë më 27 qershor një “Open Stage” në Shtetet e Bashkuara të Amerikës, si pjesë e nismave për zbulimin e talenteve të reja në diasporë.

Aktiviteti do të zhvillohet në kompleksin “Hudson Sports Complex” në Warwick, New York dhe do të drejtohet nga ish-mbrojtësi i Kombëtares shqiptare, Ansi Agolli, së bashku me përfaqësues të FSHF-së.

Aplikimet për pjesëmarrje janë ende të hapura për të gjithë të interesuarit. “Open Stage” u jep mundësinë futbollistëve shqiptarë të lindur në vitet 2010, 2011, 2012, 2013 dhe 2014, që aktivizohen në SHBA dhe Kanada, të tregojnë aftësitë dhe potencialin e tyre.

Qëllimi i kësaj nisme është evidentimi, vlerësimi dhe ndjekja nga afër e talenteve të diasporës, me synimin për t’i afruar pranë ekipeve kombëtare të moshave.

FSHF ka shtuar kontaktet me komunitetet shqiptare jashtë vendit në vitet e fundit, duke organizuar aktivitete dhe seleksionime në vende të ndryshme ku jetojnë futbollistë me origjinë shqiptare.

Vëmendje e veçantë do t’i kushtohet edhe futbollit të vajzave. Lojtaret shqiptare që aktivizohen në SHBA dhe Kanada, pa kufizim moshe, do të kenë mundësinë të marrin pjesë në këtë aktivitet, duke krijuar një tjetër mundësi për identifikimin dhe afrimin e tyre me ekipet kombëtare.