Forcimi i frangut ka prekur gjithë botën

Vendimi i Zvicrës që të heqë dorë nga kufizimi i rritjes së monedhës vendëse kishte prekur gjithë botën, tha guvernatori i Bankës Nacionale të Austrisë, Ewald Nowotny.

Ai në konferencën për magazinën ekonomike “EUROMIL” tregoi se forcimi i befasishëm i frangut zviceran ka prekur më shumë vendet e Evropës Qendrore dhe Lindore.

Novotny, i cili është zëvendëspresident i Bankës Qendrore Evropiane, shpjegoi se vlera e përqindjeve të kredive hipotekare të indeksuara në franga zvicerane, të cilat i kishin marrë qytetarët në vendet e Evropës Qendrore dhe Lindore, është e lartë.

Sipas tij, në Austri kjo arrin në 18 për qind, ndërsa në Hungari madje 26 dhe në Poloni 14 për qind.

“Unë mendoj se ne nuk duhet dramatizuar. Këto janë kryesisht kredi afatgjata, kështu që nuk ka efekte të mëdha që ndodhin menjëherë”, tha ai.
Novotny beson se situata me frangun tregon avantazhin në Bashkimin Evropian, ku ka një monedhë të përbashkët.
Duke komentuar mbi rritjen ekonomike në botë, guvernatori austriak në fjalimin e tij në konferencë theksoi se SHBA-ja ka rritje më shumë, ndërsa eurozona ka perspektiva të dobëta të rritjes.

Vendet e Evropës Qendrore dhe Lindore, shtoi ai, kanë perspektivat e rritjes që janë mbi mesataren evropiane. Edhe pse deflacioni nuk pritet, Novotny tha se bankat qendrore vazhdimisht duhet të monitorojnë zhvillimet, ngase është më vështirë për ta luftuar deflacionin sesa inflacionin.

Bankat qendrore të Evropës dhe Shteteve të Bashkuara pas krizës më 2007 kanë reaguar ashpër, ndërsa kanë aplikuar strategji të ndryshme, shpjegoi ai.