Fluks i madh në Morinë, mbi 24 mijë kosovarë hyjnë në Shqipëri brenda tri orësh

Mijëra qytetarë nga Kosova kanë kaluar kufirin drejt Shqipërisë në orët e para të mëngjesit të kësaj të shtune, ndërsa fluksi i automjeteve është shtuar edhe në Rrugën e Kombit.

Fundjava ka nisur me fluks të madh në pikën kufitare të Morinës, ku mijëra qytetarë nga Kosova kanë hyrë në Shqipëri për të kaluar fundjavën dhe pushimet verore, transmeton albinfo.ch.

Sipas të dhënave të Stacionit të Policisë Kufitare Morinë, vetëm nga ora 05:00 deri në 08:00 kanë hyrë në Shqipëri 6,847 automjete dhe 24,764 shtetas të Kosovës.

Për të përballuar numrin e lartë të udhëtarëve, Policia Kufitare po punon me të gjitha sportelet në dispozicion, me qëllim përpunimin sa më të shpejtë të hyrjeve dhe shmangien e radhëve të gjata.

Fluksi i automjeteve është shtuar edhe në Rrugën e Kombit, në drejtim të Pikës së Pagesës, ku qarkullimi është i rënduar për shkak të numrit të madh të udhëtarëve.

Masa për përshpejtimin e qarkullimit janë ndërmarrë edhe në Pikën e Pagesës së Rrugës së Kombit.

Fluksi pritet të vazhdojë gjatë gjithë fundjavës, pasi shumë qytetarë nga Kosova, por edhe nga diaspora, kanë zgjedhur bregdetin shqiptar për pushimet verore.

Të dhënat tregojnë gjithashtu për intensitetin e lartë të lëvizjeve gjatë këtij sezoni. Vetëm gjatë muajit korrik, në pikën kufitare të Morinës janë përpunuar rreth 422 mijë udhëtarë dhe 130 mijë automjete./Albinfo.ch

---