Erdogan: Turqia do të vazhdojë ta mbështesë Kosovën në arenën ndërkombëtare

Presidenti turk u takua me kryeministrin Albin Kurti në Nju Jork, ku diskutuan marrëdhëniet dypalëshe dhe zhvillimet rajonale.

Presidenti i Turqisë, Recep Tayyip Erdoğan, është takuar me kryeministrin e Kosovës, Albin Kurti, në Nju Jork, në kuadër të javës së nivelit të lartë të Asamblesë së Përgjithshme të OKB-së, përcjell albinfo.ch.

Sipas Presidencës turke, në takim u diskutuan marrëdhëniet mes Turqisë dhe Kosovës, si dhe çështje rajonale e globale.

Erdoğan tha se të dyja vendet do të vazhdojnë të punojnë për rritjen e tregtisë dhe thellimin e bashkëpunimit në fushën e sigurisë dhe industrisë së mbrojtjes.

Ai rikonfirmoi gjithashtu mbështetjen e Turqisë për Kosovën në përpjekjet e saj për të zënë, siç u shpreh, vendin e saj të merituar në komunitetin ndërkombëtar. Erdoğan tha se Turqia mbështet edhe dialogun ndërmjet vendeve të Ballkanit.

Në fund të takimit, presidenti turk e ftoi kryeministrin Kurti të marrë pjesë në Samitin e Liderëve të COP31, i cili do të mbahet në Turqi./Albinfo.ch

---