Edhe Nokia do të ndërpresë bizneset në Rusi

Prodhuesi i pajisjeve të telekomunikacionit Nokia do të tërhiqet nga tregu rus.

Lajmi është konfirmuar nga CEO i kompanisë, Pekka Lundmark, duke shkuar një hap më tej se kompania rivale Ericsson, e cila kishte pezulluar aktivitetin e saj në Rusi vetëm për një periudhë të pacaktuar.

Qindra kompani të huaja po ndërpresin lidhjet me Rusinë pas pushtimit të saj në Ukrainë më 24 shkurt dhe pas sanksioneve perëndimore kundër Moskës.

Kompania deklaroi se vendimi për largimin nga tregu i Rusisë, ishte alternativa e vetme dhe më e mirë.

“Ne thjesht nuk shohim asnjë mundësi për të vazhduar aktivitetin tonë në rrethanat aktuale”, tha Lundmark në një intervistë.

Rusia është gjithashtu në mosmarrëveshje me Finlandën dhe Suedinë, vendet e origjinës përkatësisht të Nokia-s dhe Ericsson-it, lidhur me interesin e tyre për t’u bashkuar me aleancën ushtarake të NATO-s./Reuters