Dy persona të kërkuar ndërkombëtarisht ekstradohen në Kosovë nga Zvicra dhe Shqipëria

Policia e Kosovës ka njoftuar se ka përfunduar me sukses ekstradimin e dy shtetasve kosovarë të cilët ishin në kërkim ndërkombëtar.

Njëri prej tyre u ekstradua nga Zvicra, ku ishte arrestuar në bazë të një urdhër-kërkimi të INTERPOL-it të lëshuar nga autoritetet e drejtësisë së Kosovës për veprën penale “Grabitje”. Pas kthimit në Kosovë, personi i është dorëzuar njësive përkatëse të Policisë së Kosovës në Rajonin e Gjilanit për të vazhduar procedurat ligjore.

Ndërsa personi i dytë u ekstradua nga Shqipëria, pasi ishte ndaluar nga autoritetet shqiptare në bazë të një kërkese ndërkombëtare të INTERPOL-it për veprën penale “Arratisje nga institucioni”. Ky person më herët ishte dënuar për “dhënie të ndihmës në vrasje të rëndë”, ndërsa ishte larguar për t’iu shmangur vuajtjes së dënimit.

Pas ekstradimit në Kosovë, edhe ai iu dorëzua Policisë së Kosovës në Rajonin e Pejës për procedurat e mëtejshme ligjore.