Dy kërcënime me bombë në Valis

Se nuk bëhet fjalë për ndonjë shaka fëmijësh flet me fakti se shkresa me kërcënimin për bombë, është shkruar nga dora e një të rrituri

Dy kërcënime me bombë kanë shqetësuar qytetarët e Brig-ut dhe ata të Martigny-t (Valis) gjatë ditës së sotme. Kërcënimi i parë ishte bërë në një filialë të Migros-it në Brig, ndërsa i dyti, në një restorant në qytetin Martigny.

Në të dyja rastet, siç shkruan Blick.ch, janë evakuuar personeli dhe qytetarët e ndërtesave të afërta, dhe, pas kontrollimit të bërë nga policia, nuk është gjetur asgjë e dyshimtë.

Ajo që ka mundur të konstatojë policia me këtë rast është se nuk bëhet fjalë për ndonjë shaka fëmijësh. Kjo lidhet me faktin se shkresa me kërcënimin për bombë, e gjetur në rastin e parë është shkruar nga dora e një të rrituri.

Në rastin e parë, letrën ku shkruhej se një bombë do të shpërthente në orën 15.00 e kishte gjetur një kliente e Migros-it, në wc-në e kësaj shitoreje, ndërsa në Martigny, kërcënimi kishte ardhur përmes telefonit.