Diaspora nis peticionin për mbledhjen e nënshkrimeve për zgjedhjen e Murat Jasharit president

Inicohet peticion nga diaspora për kandidimin e Murat Jasharit për president

Analisti politik Xhevdet Pozhari ka bërë të ditur se nga diaspora është iniciuar një peticion për kandidimin e Murat Jasharit për president të Kosovës, transmeton albinfo.ch.

Sipas Pozharit, deri më tani peticioni është nënshkruar nga 244 persona.

PETICIONI

Ndërkohë, të martën përfundon afati kushtetues për zgjedhjen e presidentit të ri të Kosovës, çka ka rritur presionin mbi subjektet politike për të arritur një marrëveshje.

Gjatë ditës së sotme, Lëvizja Vetëvendosje ka ftuar Partinë Demokratike të Kosovës dhe Lidhjen Demokratike të Kosovës që të propozojnë së bashku tre kandidatë për postin e presidentit. Sipas VV-së, kandidatët duhet të jenë figura unifikuese, me integritet të lartë qytetar e kombëtar, me kontribut të dëshmuar profesional dhe jashtë skenës aktuale politike.

Vetëvendosje ka bërë të ditur se për secilin kandidat do të siguroheshin së paku 90 nënshkrime të deputetëve të Kuvendit, ndërsa në rast të një marrëveshjeje do të tërhiqeshin nga kandidatura Glauk Konjufca dhe Fatmire Mulhaxha-Kollçaku.

Ky subjekt ka theksuar se koha është e kufizuar për shkak të afateve kushtetuese dhe ka kërkuar përgjigje nga PDK dhe LDK deri të dielën në mbrëmje.

Në anën tjetër, Murat Jashari ka refuzuar mundësinë për të marrë postin e presidentit, duke deklaruar se familja Jashari “i takon gjithë shqiptarëve” dhe nuk duhet të përfshihet në kalkulime politike./Albinfo.ch

---