Detaje nga rasti i të infektuarit me koronavirus në Zvicër

Kjo sëmundje po vazhdon të përhapet, derisa ka përfshirë disa vende evropiane

Autoritetet zvicerane konfirmuan rastin e parë të koronavirusit të ri në këtë vend.

Ai është një burrë 70-vjeçar, i cili u testua pozitiv në kantonin jugor të Ticinos, në kufirin me Italinë.

“Personi i infektuar ishte në Itali rreth dhjetë ditë më parë dhe mori pjesë në një ngjarje afër Milanos”, tha ministria zvicerane e shëndetësisë, në një deklaratë.

Njerëzit me të cilët ky person kishte kontakte janë futur në karantinë për 14 ditë, transmeton Evropa e Lirë.

Autoritetet zvicerane thanë se nuk ishte e nevojshme në këtë fazë të merren masa të mëtejshme, siç është mbyllja e shkollave, përcjell albinfo.ch.

Shpërthimi më i madh i virusit në Evropë është aktualisht në Itali, me më shumë se 280 infeksione dhe 11 vdekje.

Virusi i ri tashmë ka vrarë më shumë se 2,600 njerëz, shumica e tyre në Kinë, dhe është përhapur në rreth 30 vende të tjera, raporton Reuters.

Numri i personave të infektuar është rritur në 80.114. Rumania dhe Austria konfirmuan gjithashtu rastet e para me koronavirus. Koronavirusi shkakton simptome të ngjashme me pneumoninë. Ende nuk ka vaksinë për të.

---