Deputetët e SVP-së përleshen me policinë, u pengon pritja e kryeparlamentarit ukrainas

Aeschi dhe Graber u rezistuan urdhrave të policëve për të mos vazhduar tutje, me ç'rast ata i penguan fizikisht dy politikanët e SVP-së

Vizita e Presidentit të Parlamentit të Ukrainës Ruslan Stefanchuck në Pallatin Federal në Bernë ka çuar në një konfrontim midis oficerëve të policisë federale dhe dy deputetëve kombëtarë të SVP.

Policia mbylli për pak kohë shkallët e mëdha të parlamentit, të cilat deputetët Thomas Aeschi (kryetar i grupit parlamentar të SVP-së) dhe Michael Graber donin të përdornin në të njëjtin moment, transmeton albinfo.ch. Gazetat Tamedia citojnë dëshmitarët se Aeschi dhe Graber u rezistuan urdhrave të policëve për të mos vazhduar tutje, me ç’rast i penguan dy politikanët e SVP-së të shkonin më tej.

Aeschi ka shkruar në X se nuk mund të lejonte të ndalohej sepse puna parlamentare kishte përparësi ndaj vizitave shtetërore të huaja.

Eric Nussbaumer, kryetar i Këshillit Kombëtar, komentoi pas përleshjes në Pallatin Federal. Ai ka thënë: “Vlejnë rregullat tona të shtëpisë. Personeli i sigurisë jep udhëzime dhe udhëzimet e personelit të sigurisë duhet të ndiqen”.

Michael Graber ka thënë për Blick se ai ishte penguar me forcë të lëvizte lirshëm në Pallatin Federal.

Nuk është incidenti i parë në Pallatin Federal në të cilin përfaqësuesit e SVP kanë shkaktuar skandale në lidhje me Ukrainën: pothuajse saktësisht një vit më parë, Presidenti ukrainas Volodymyr Zelenskyj i qe drejtuar Parlamentit zviceran në një lidhje përmes videos, përcjell albinfo.ch. SVP kishte bojkotuar ngjarjen sepse e pa paraqitjen e Zelensky si një kërcënim për neutralitetin. Dhe ishte Thomas Aeschi që u përpoq të parandalonte paraqitjen paraprakisht.

---