Cili është politikani më i lartë i Zvicrës?

A është Kryetari i Parlamentit apo Kryetari i Federatës politikani numër një i Zvicrës?! Kjo është çështja

Në mes të parlamentit dhe qeverisë, gjegjësisht në mes të legjislativit dhe ekzekutivit të vendit në vazhdimësi ka pasur një rivalitet: Cili është politikani më i lartë i Zvicrës: kryetari i Parlamentit apo Kryetari i Federatës?! Ky i fundit (kryetari i federatës) zgjidhet në mënyrë rotative nga përberja e qeverisë, gjegjësisht  këtë post e merr për çdo vit njëri nga ministrat, edhe pse i nënshtrohet zgjedhjes nga parlamenti dhe duhet të plotësojë një minimum të nevojshëm votash.

Siç shkruan gazeta “Ostschweiz und Zentralschweiz am Sonntag“ ende nuk është arritur pajtimi lidhur me këtë çështje. Fundi i vitit 2014 ka qenë afati deri kur administrata së bashku me shërbimet parlamentare është dashur ta përpunonin së bashku një propozim lidhur me këtë. Por, siç ka thënë për gazetën një zëdhënës i shërbimeve parlamentare, kjo gjë nuk ka ndodhur akoma. Në dispozicion janë vetëm propozimet e ndryshme të të dyja palëve.

Sipas një zëdhënësi të EDA-s (Departamenti Jashtëm), këtë çështje do të duhet ta sqarojë dhe përkufizojë një ekspertizë juridike që pritet të bëhet.