CD-ja ka mbushur 30 vjet!

Kalimi nga pllakat dhe kasetat në cd, ka revolucionarizuar teknikën e inçizimit dhe mënyrën e dëgjimit të muzikës

Janë mbushur dje, plot 30 vjet nga dita kur ka filluar prodhimi i kompakt diskut (cd). Një objekt kaq i thjeshtë dhe i nënkuptueshëm sot, ka pasur premierën e tij më 2 tetor 1982, kur në shitoret e muzikës kishte dalë në shitje cd-ja me albumin muzikor “52nd Street” të Billy Joel.

Kalimi nga pllakat e gramofonit dhe kasetat magnetofonike në cd, ka revolucionarizuar teknikën e inçizimit dhe mënyrën e dëgjimit të muzikës. Kompakt disqet që dolën atëbotë në treg nuk kishin anën A dhe B, sikur paraardhëset e tyre.

Po ashtu, për shkakun se laseri e gjen vetë fillimin e këngëve të caktuara, me cd-të ka humbur kuptimi i albumeve muzikore si tërësi. Mbetet e kontestuar arsyeja përse një cd duhet të përmbajë saktësisht 74 minuta muzikë.

Ndër spekulimet që qarkullojnë lidhur me këtë është edhe ai se zbuluesit e cd-së me këtë veprim kishin pasur parasysh që një cd të kishte vend tamam për Simfoninë e nëntë të Bethovenit, e cila zgjat 74 minuta.