Bundestag miraton ashpërsimin e rregullave të azilit sipas reformës së BE-së

Gjermania përfshin në legjislacionin kombëtar reformën GEAS, parashikohen procedura më të shpejta dhe rregulla të reja për punësimin

Parlamenti gjerman, Bundestag, ka miratuar ashpërsimin e ligjit të azilit, duke përfshirë në legjislacionin kombëtar Reformën e Sistemit të Përbashkët Evropian të Azilit (GEAS). Me votat e koalicionit qeveritar, Gjermania synon të frenojë migracionin e paligjshëm dhe ta rregullojë më mirë atë përmes procedurave më të shpejta, kontrolleve më të rrepta dhe rregullave të reja për qasjen në tregun e punës, përcjell albinfo.ch.

Reforma GEAS, e ndërmarrë nga Bashkimi Evropian, synon unifikimin e sistemeve të azilit në të gjitha shtetet anëtare dhe konsiderohet si ndryshimi më i gjerë deri tani në të drejtën evropiane të azilit. Ajo pritet të hyjë në fuqi më 12 qershor.

Ndër masat e reja, landeve federale në Gjermani u mundësohet krijimi i qendrave të ashtuquajtura të “migrimit sekondar” për persona që kërkojnë azil në Gjermani, por për të cilët përgjegjës është një shtet tjetër anëtar i BE-së.

Nga ana tjetër, rregullat e reja parashikojnë lehtësime për azilkërkuesit me perspektivë qëndrimi në Gjermani, duke u lejuar atyre të fillojnë punë pas tre muajsh. Aktualisht, në praktikë ekziston një ndalim punësimi prej gjashtë muajsh për ata që jetojnë në qendra pritjeje.

Procedura në kufijtë e jashtëm dhe në shtete të treta

Sipas reformës, procedurat e azilit mund të zhvillohen edhe në kufijtë e jashtëm të BE-së. Gjithashtu parashikohet që migrantët të dërgohen në shtete të treta jashtë BE-së, ku mund të kryhen procedurat përkatëse.

Ministri federal i Punëve të Brendshme, Alexander Dobrindt, është ndër përkrahësit kryesorë të kësaj qasjeje, duke mbështetur mundësinë që azilkërkuesit që kërkojnë strehim në Gjermani të transferohen në vende të treta. Së fundmi, BE-ja ka vendosur që refugjatët mund të dëbohen edhe në shtete me të cilat nuk kanë lidhje të drejtpërdrejta.

Autoritetet gjermane theksojnë se ndryshimet synojnë të rrisin efikasitetin e sistemit të azilit dhe të sigurojnë një menaxhim më të kontrolluar të migracionit./Albinfo.ch

---