Bora shkakton telashet e para në trafik

Në mëngjesin e sotëm bora ka shkaktuar pengesa në komunikacionin rrugor në pjesë të ndryshme të Zvicrës

Edhe zviceranët di t`i «befasojë» bora në dimër! Në një kohë kur ështe pritur me padurim, ajo, bora që sapo ka filluar të bjerë, ka shkaktuar telashe të konsiderueshme në trafik. Reshjet e borës që aty-këtu në zonat malore patën filluar më 1 janar, dje dhe sot kanë «zbritur» edhe në ultësira.

Në mëngjesin e sotëm bora ka shkaktuar pengesa në komunikacionin rrugor në pjesë të ndryshme të Zvicrës. Kështu, një numër rrugësh në Valis, Berner Oberland dhe në Graubünden janë mbuluar nga bora. Ndërkaq rruga në qafën San Bernardino është ndaluar për kamionë. Atyre u ndërpritet rruga nga të dy anët e San Bernardinos, në Chur dhe në Mesocco, njofton srf.ch. Rrugët janë në shumë vende të mbuluara nga bora.

Nga ana tjetër, aq sa i ka shkaktuar telashe komunikacionit, bora e re ka gëzuar qendrat e sporteve dimërore.

Sipas institutit për kërkime të borës dhe të ortiqeve, borë ka reshur gjithandej në malet e Zvicrës por më së shumti në Valisin e ulët.