Bora ndalon trafikun në Slloveni, familje kosovare bllokohet për orë të tëra

Mërgimtarët po përballen me vështirësi të mëdha gjatë kthimit në vendet ku punojnë dhe jetojnë.

Reshjet e dendura të borës dhe kushtet e rënda të motit kanë shkaktuar bllokime në rrugët ndërkombëtare, duke detyruar qytetarët të presin orë të tëra pa mundësi për të lëvizur.

Një mërgimtar ka ndarë përvojën e tij me Klankosova, duke treguar se ai dhe familja e tij kanë qëndruar të bllokuar në autostradën A1 në Slloveni për më shumë se katër orë, pa lëvizur fare.

Ai tha gjithashtu se pritjet janë të gjata edhe në Merdare dhe në Kroaci.

“Jam një qytetar i Kosovës me familjen time, gruan dhe tre fëmijët, djalin dhe dy vajzat e vogla, 7 dhe 6 vjeç. Situata është jashtëzakonisht e vështirë. Në Slloveni jemi të bllokuar në A1 për katër orë pa lëvizur, dhe nuk ka askush që të na ndihmojë.”

“Që nga nisja nga Kosova dje në orën 14:00, deri tani kemi arritur të përshkojmë vetëm 1000 km. Kemi pritur tre orë në Merdare dhe shtatë orë në Kroaci. Askush nuk duket të merret me vështirësitë tona,” shtoi ai.