BE-ja rikonfirmon mbështetjen për zgjerimin, edhe Kosova pjesë e procesit

Bashkimi Evropian thekson se anëtarësimi bazohet në meritë, ndërsa progresi varet nga zbatimi i reformave dhe përmbushja e standardeve.

Bashkimi Evropian ka rikonfirmuar përkushtimin e tij ndaj procesit të zgjerimit, duke e cilësuar atë si një nga projektet më të rëndësishme strategjike për të ardhmen e kontinentit, transmeton albinfo.ch.

Sipas një publikimi të Parlamentit Evropian, procesi i anëtarësimit vazhdon të mbështetet në parimin e meritës, që nënkupton se secili shtet vlerësohet individualisht në bazë të progresit të arritur në zbatimin e reformave dhe përmbushjen e kritereve të BE-së.

Në mesin e vendeve të përfshira në këtë proces është edhe Kosova, e cila dorëzoi aplikimin për anëtarësim në Bashkimin Evropian në vitin 2022. Pjesë e procesit janë gjithashtu Shqipëria, Bosnja dhe Hercegovina, Mali i Zi, Maqedonia e Veriut dhe Serbia, të cilat ndodhen në faza të ndryshme të negociatave ose të statusit kandidat.

Ndërkohë, Moldavia, Ukraina dhe Gjeorgjia janë përfshirë në valën më të fundit të zgjerimit, duke avancuar drejt integrimit evropian.

Institucionet evropiane ritheksojnë se përparimi i secilit vend varet nga zbatimi i reformave të nevojshme dhe respektimi i standardeve të Bashkimit Evropian.

Sipas BE-së, zgjerimi mbetet një investim strategjik për forcimin e stabilitetit, sigurisë dhe zhvillimit ekonomik në të gjithë Evropën./Albinfo.ch

---