Austria mirëpret krijimin e qeverinlsë së re të Kosovës

Foto: Ambasada e Republikës së Kosovës në Austri

Ministrja e Punëve të Jashtme e Austrisë, Beate Meinl-Reisinger, e ka cilësuar formimin e qeverisë së re në Kosovë si “një lajm të mirë për vendin dhe gjithë rajonin”.

Në një reagim publik, ajo theksoi se tashmë Kosova ka mundësinë të avancojë me zbatimin e reformave të kërkuara nga Bashkimi Evropian dhe të përfitojë nga Plani i Rritjes i BE-së, si dhe të shënojë progres në dialogun ndërmjet Beogradit dhe Prishtinës.

“Formimi i një qeverie të re në Kosovë është lajm i mirë për vendin dhe për gjithë rajonin. Kosova tani mund të ecë përpara për të zbatuar reformat e BE-së dhe të përfitojë nga Plani i Rritjes, por edhe të arrijë përparim në dialogun Beograd–Prishtinë”, ka shkruar Meinl-Reisinger.

Kryediplomatja austriake ka uruar gjithashtu homologun e saj të ri, Glauk Konjufca, duke theksuar se pret me padurim vazhdimin e bashkëpunimit të shkëlqyer ndërmjet Austrisë dhe Kosovës.