Anne Emery-Torracinta, kandidate e SP-PS-së në Gjenevë

Deputetja aktuale kantonale, Emery-Torracinta, preferohet si kandidate zyrtare për vendin e Mark Muller-it

Deputetja 54-vjeçare e Partisë Socialiste në Gjenevë është kandidate zyrtare e kësaj partie për zgjedhjet kantonale që do të organizohen më 17 qershor për ta zëvendësuar ish-këshilltarin e Shtetit liberal-radikal në dorëheqje, Mark Muller.

Ky i fundit u tërhoq për arsye të presioneve që i kishin lindur pas telasheve me organet e drejtësisë pas një kacafytjeje, në muajin dhjetor, në një diskotekë të Gjenevës.

Manuel Tornare, deputeti federal i SP-PS-së të Gjenevës dhe njëherësh kryetar i Universitetit Popullor Shqiptar në Gjenevë nuk u zgjedh nga militantët e kësaj partie që ishin mbledhur për ta përcaktuar kandidatin e tyre. Në fakt, është dashur të mbahen dy runde para se të zgjedhet Anne Emery-Torracinta me 224 vota.

E posazgjedhura i ka shpallur synimin e asaj për t’u angazhuar për çështjen e banimit si dhe të sigurisë në Gjenevë.

Emery-Torracinta do të jetë në kokurrencë me kandidatin, njëherësh kryetarin e Qytetit të Gjenevës, Pierre Maudet. Kandidatët e tjerë në lojë janë Eric Stauffer nga Lëvizja qytetare gjenevase (MCG) si dhe kryetari i të Gjelbërve gjenevas, Laurent Seydoux.