Ambasada e Shteteve të Bashkuara të Amerikës në Prishtinë ka nderuar policin e Kosovës, Afrim Bunjaku, i cili u vra në krye të detyrës gjatë sulmit të armatosur në Banjskë më 24 shtator 2023.
Përmes një postimi, Ambasada amerikane tha se i bashkohet Kosovës në përkujtimin e Bunjakut, duke ritheksuar njëkohësisht thirrjen për përgjegjësi për autorët e sulmit.
“Ritheksojmë thirrjen tonë që autorët të mbahen përgjegjës”, thuhet në deklaratën e Ambasadës së SHBA-së në Prishtinë.
Bunjaku u vra gjatë përleshjeve ndërmjet Policisë së Kosovës dhe një grupi të armatosur serb në Banjskë. Pas vdekjes, ai u nderua me titullin “Hero i Kosovës”.